(1932) Cangrexos espirituales

link

Vieno don Xuan de pescar
con toos los aparexos,
y unvió al cura del llugar
seis docenes de cangrexos,
tan vivos como na mar.
Encamento–y el recáu
a Bartolo el so criau,
y pa que non faltás nada
echo–y pal cura empastiada
una isquela per de llau.
Apencó’l probe Bartolo
col maniegu de cangrexos,
que sol llombu del virolo
todos tomaron el tolo
del cestu pelos requexos.
Allugóse illi en fegura
metanos la corrá’l cura
y unvio–y la carta apiegada
con pastia, pela criada
con toa la finosura.
Al puntu perxaraneru
como tou güen manigueru
asomó’l cura a un ventán
y encamentó al mandaderu
diés les gracies a don Xuan
pelo que d’él se acordaba,
pelos dixos y los fexos;
y claro está que–y les daba
en premiu po los cangrexos
qu’allí na carta–y unviaba.
M’allegro que metu mieu,
diz Bartolo, dando fueu,
de que–y los unvie na carta,
pos nel cestu, ansí me parta
si s’afaya escarrapéu.